O le Aso Gafua 27 o Novema na taunuu mai ai i Aukilani le aumalaga a le aoga o le Kolisi o Aleipata.
E 33 i latou o loo malaga mai e aofia ai tama taaalo faapea ma faiaoga ma le pulega o le ‘au.
O le sini autu o le malaga o avanoa e malaga mai ai fanau e asiasi mai i Niu Sila, ma vaavaai ni ‘au a aoga iinei latou te taaalo faatasi ai ma le samiga o le latou siamupini i taaloga lakapi a aoga lea sa fai i Samoa i lenei tausaga.
Ma o le avanoa foi e auai mai ai e fai ma sui o Samoa i le taamilosaga taitoafitu a aoga lea e faia i le aso 15, 16 ma le 17 o Tesema.
O le tausaga ua mavae sa fili mai ai le ‘au a tamaiti aoga a Samoa i lea taamilosaga peitai o le tausaga lenei ua tuu atu aloaia e le iuni lakapi a Samoa le valaaulia i le Kolisi o Aleipata e fai ai i latou ma avefu’a a le atunuu i lea foi taamilosaga i totonu o Aukilani.
Ma o se avanoa pito sili ona maualuga i totonu o le Kolisi o Aleipata i le faatāuaina o le taumafaiga a alo ma fanau o le itumalo e pei ona iai i taamilosaga a aoga i Samoa.
O se avanoa foi e malaga mai ai e vaavaai ni konekarate ma aoga e faaauau ai aoga ma le taleni o le lakapi.
E tasi le tamaititi aoga le susuga ia Eletise Ese lea ua maua lona avanoa i le aoga a Massey High School e aoga ai ma taalo, ae o le susuga ia Malakesi o lea ua piki atu i le ‘au taitoafitu a le Manu Samoa.
Ma o loo vaavaai pea le susuga i le tamaitai pule aoga ia Sani Matamu To’a ma le vasega o faiaoga i nisi o avanoa e ono maua i aoga iinei mo nisi fanau aoga a le Kolisi.
