E lei faia lava ni moliaga a leoleo i le susuga Tuilaepa L Sailele Malielegaoi, ona o le taunuuga o a latou suesuega i le tagi a le Minisita o Galuega Tetele faasaga i le susuga Tuilaepa Lupesoliai SaileleMalielegaoi, le sui faipule o le itumalo palota o Lepa, o loo faamalolo le tumau ona tofiga faafaipule mo le 2 tausaga.
Ua faailoa e le Komesina o Leoleo le susuga Auapaau Logoitino Filipo, ina ua fesootai iai, o le faila oa latou suesuega lea sa ave i le Loia Sili mo sana iloiloga, ma ua toe foi atu i leoleo lea faila, ua faapena ona tuuina atu nei i se loia tutoatasi o le a finauina le itu a leoleo pe a faapea o le a faia se faamasinoga o le tagi a Olo Fiti Vaai.
Na toe tuliloa se finagalo o le Komesina o leoleo i le mataupu lenei, ona o se molimau na ia faailoa mai ua faia moliaga faasaga i le susuga Tuilaepa, peitai na tali mai le komesina o leoleo e le sao lea tulaga, ae o loo silasila muamua iai le loia tutoatasi o le a finauina le mataupu pe a faapea e faia ni moliaga.
O le iloiloga a le Loia Sili i le suesuega a leoleo na faamalieina ai vaega uma o mau ua faamaopoopo e lagolago ai ni moliaga, seia vagana se tasi o vaega sa toe talosagaina e le Loia Sili e toe sailiili atili iai ina ne’i vaivai ai le finau a leoleo, ae avea ma pulu malosi e osofai atu ai ni mau a le itu o loo tuuaia.
O lea sailiili ua maea ma ua tauaao nei e leoleo faamaumauga e avea ma mau. O le tamaitai loia le afioga Mauga Precious Chang na faailoa e le Loia Sili i lana tusi na ave i le komesina o leoleo, o loo iai lona naunautaiga e mafai ona avea ma private prosecutor e finauina le mataupu.
