Ua sauni se alii faipisinisi mai Saina ua faaipoipo i se tamaitai Samoa i se faai’uga a le faamasinoga pe talia lana talosaga e ala i lana loia, ia faaitiitia lana salatupe ina ua ioe i le moliaga o le taumafai e ave se pusaoloa 20 futu o se uta o figota o mama’o, sea ma fugafuga e tusa lo latou mamafa ma le 6,214 tesimale 79 kilokalama.
O le tau o ia figota mai le gataifale o le tatou atunuu pe ana sao ese ma Samoa ma taunuu i maketi i Asia e mana’omia tele ai ia figota mo taumafa, e tusa ma le 3 tesimale 6 miliona tala Amerika.
E lē gata ina ioe le alii faipisinisi o Tom o le isi ona suafa o Quinn Ping, i lea moliaga a leoleo, ae sa ia ioe foi i lona ave o se tinoitupe e 5 afe tala i lē sa avea ma Ofisa Sili o le pulega o le matagaluega o Tiute ma Tupe Maua i se taumafaiga e tauanau ai le Ofisa Sili, ia aua ne’i su’esu’eina le pusaoloa o lana uta o figota na taofia e le ofisa o le tiute.
O le toe valaauina o le alii faipisinisi e oo atu i le faamasinoga faaitumalo i le Aso Gafua o le vaiaso nei, na tuuina atu ai le finauga ma le folasaga a lana loia, e fua iai se faasalaga. Na faailoa ai e lana loia o le 50 afe tala o le sala tupe ua finauina e loia a leoleo, o se tinoitupe maualuga tele ma e lē gafatia e lē ua molia.
O le talosaga a lana loia ia toe iloilo e le faamasinoga se isi aofaiga talafeagai o le salatupe, ona e lē na o lē ua molia na aafia i le gaioiga, e iai ma isi tagata e maualuluga atu ia te ia.
Peitai na faailoa iai e le faamasinoga le afioga Leota Raymond Schuster, e tatau ona faailoa atu poo ai ia tagata, ona afai ua ioe to’atasi lē ua molia i moliaga a leoleo, o lona uiga ua ia malie atoatoa na te tauave atoa le mamafa o le solitulafono.
Ua tāpā nei e le faamasino loia a leoleo e tuuina atu le tau atoa o le pusaoloa o fugafuga, mama’o ma sea, ona fua lea iai o se faai’uga, e pei ona tatalo le loia a Quinn Ping poo Tom, e lē gafatia e lē ua molia ona totogi le limasefulu afe tala ($50,000) o le sala tupe ua finau atu ai le itu a leoleo.
O le masina o Aperila o le tausaga e 2020 na tulai mai ai lea gaioiga faasolitulafono, ae o lea ua tolo atu i le aso 9 o le masina fou o Setema e faia ai se faai’uga.
