O faiaoga o Aoga Amata a Niu Sila o loo agai mai iai nisi o taumafaiga a le setete o Vitoria i Ausetalia ma folafola mai iai ni fesoasoani e faatatau i le agai atu e aumau ma faigaluega ai i lea setete.
O le campaign a Vitoria o loo faagasolo e faaigoa o le Best Start Best Life, ua unaia ai faiaoga ia agai atu mai Niu Sila nei i Ausetalia e faigaluega ma aumau ai.
Ua faailoa mai ai i tagata Niu Sila o loo iai galuega mo tagata uma, mai lava i le aai tele o Melepone agai atu i nofoaga maotua ma o loo tele le manaoga mo faiaoga ma pule o Aoga Amata.
Fai mai e amata i le 9 afe i le 50 afe tupe ua ofo ane e fesoasoani ai pe a masii atu le tagata i Ausetalia mo ia galuega e fua i le nofoaga e agai iai ma le auaunaga.
O le popolega e pei ona faailoa e le Newshub, o le agai atu lea o faiaoga o Aoga Amata a Niu Sila ina ua faalogoina foi faamatalaga mai le NZME ua iloa ai o loo mataitu foi e le aufaigaluega tausi soifua a Niu Sila avanoa i Ausetalia ona o le lelei o totogi ma tulaga lelei o galuega.
