O Ueligitone le aai ua faamauina le tele o le pau o le tau o fale. Toeitiiti 19% ua sau ai i lalo le tau o fale faatusa i le tausaga talu ai e tusa ma suesuega.
O le va o Ianuari ma Novema o le tausaga nei lea na tele ina pau ai le tau o fale ma ua silia ma le 15 tausaga faatoa toe molimauina lea i le maketi o fale a Niu Sila.
I le aotelega o fale i Niu Sila ma o latou fale o lea e tusa ma le $945,568, tusa lea ma le 10.2% ua maualalo ai faatusa i tau sa iai i le amataga o le tausaga nei.
Ae i le tau o fale i Ueligitone o lea ua tusa ma le $883,900 faatusa i le $1,086,400 sa faamauina ia Novema o le 2021. O loo vavalo e le vaega suesue na tuufaatasia nei suesuega le faaauau ona pau o fale o Ueligitone.
O Palmerston North e sosoo atu iai lea e 14.5% ua sau ai i lalo, Hastings e 12.5% ma Aukilani i le lona fa e 12.2%. I le faafeagai, e na o le Queenstoen le aai ua alu i luga tau o fale i le 5.4%.
