Ua toe tauaofia le fono usu a Samoa i le faaauauina o galuega a le fono aoao faitulafono, lea na faatulaga e tauaofia i le masina na tea nei o Setema peitai na toe tolopo mai i le aso 24 o le masina nei o Oketopa.

O le toe usuia o le fono a le Palemene i le Aso Lua o lenei vaiaso o le a faatauto ai ma sui faipule na toe filifilia mai i palota laiti a itumalo o Faleata 4, Vaa o Fonoti ma Siumu lea sa faatino i le masina o Setema, ina ua avanoa nofoa o ia itumalo palota e mafua i le faamavae mai le vaega faaupufai e puipuia aiātatau a tagata o sui usufono o ia itumalo sa lesitala ma tauva i le palota tele i lea pati faaupufai.

Ua avea nei le tofa Ale Vena Ale, le tofa Ma’uu Siaosi Puepuemai ma le fetalaiga Tu’uu Anasii Leota ma sui lagolago ua lesitala i le vaega faaupufai o le Faatuatua i le Atua  Samoa ua Tasi.

Ua umia ai e lea pati faaupufai nofoa e 35 o le aofaiga e 52 o nofoa ua iai nei o le paeaiga lona 17 a le Palemene o Samoa.