Ua tauaofia i le Aso Gafua o lenei vaiaso fou i Samoa le fonotaga lona lua a le paea’iga 18 a le Palemene i le faamoemoe e faataatia ai le tala faatatau autū o le tupe mo galuega faaauau a le malo mo le valu masina o loo totoe o le tausaga faaletupe 2025 i le 2026 e amata i le masina fou o Novema.
O le tauaofiaga a le fono aoao faitulafono ua lē auai le ta’ita’i o le Malo le afioga i le Palemia, susuga Laaulialemalietoa Leuatea Polataivao Fosi Schmidt e pei ona sa iai le fuafuaga ona ua faailoa e le afioga i le Sui Palemia, afioga Toelupe Maoiautele Poumulinuku Onesemo o loo fautuaina e foma’i le mana’omia o se taimi e mālōlō ai le Palemia ina ua mae’a se ta’otoga i lona aao.
O le aso 19 o Oketopa e faato’ā toe taliu mai ai i Samoa le ta’ita’i o le malo mai lana siigā gasegase e pei ona iai nei i Niu Sila.
Le afioga i le Sui Palemia, afioga Toelupe Maoiautele Poumulinuku Onesemo sa ta’ita’ia le usugafono a Samoa i le tauaofiaga lona 80 a Malo Aufaatasi.
