Ua mae’a le fitu vaiaso o faatino e le vaega mai Hunan i Saina se aoaoga faapitoa e aoaoina ai le silia ma le 50 o tina mai Upolu ma Savaii i galuega taulima ma le su’isu’i.
O lenei faamoemoe na faamae’aina lea i se sauniga e aloaia ai le mae’a o le fitu vaiaso o feagai ai tina ma lenei aoaoga.
O le Minisita o Tina ma Tamaitai Atinae o Afioaga ma Agafesootai, Afioga Mulipola Anarosa Ale-Molioo na saunoa e momoli le agaga faafetai i le Malo o Saina e ala i ona tagata sa auina mai e faafoeina lenei aoaoga.
“O le autu lava o lenei faamoemoe ia maua le tomai ma agavaa i nai o tatou tina ma le tupulaga talavou e mafai ai ona amata nai a latou pisinisi laiti auā le tupe maua e tausia ai aiga.
“O lenei foi aoaoga o se taumafaiga a le Malo i vaega ua mae’a faataatitia e aofia ai atinae ma agafesootai i ona alafua 2021-2026.
“O se fiafiaga tele lea e ala i le fesoasoani ma le lagolago a le Malo o Saina i le tele o vaega o tatou moomia ai le fesoasoani lea ua tali faaaliali e ala i fua o lenei aoaoga ua tatou molimauina.
“Sa maua foi le avanoa e matamata ai i galuega a i latou na auai i lenei aoaoga ma o se vaaiga ofoofogia lea i taumafaiga mai o lenei tomai e o tatou sui auai.”
Na tauaaoina ai tusipasi mo tina ma tupulaga Talavou i le Maota o Salamasina e amanaia ai le faamae’aina o le aoaoga i tomai i galuega taulima ma suisuiga mo sui auai sa filifilia mai i Itumalo e 51 o Samoa.
O lenei aoaoga sa amata faatautaia mai i le aso 21 o Aokuso 2023 e faiaoga faapitoa mai le Kolisi mo matata eseese i Hunan Saina, ma e 21 tina mai Savaii ma le 63 mai Upolu sa filifilia mai itumalo e 51 e auai ai.
I faigapaaga lelei a le Malo o Samoa ma le Malo o Saina, ua faameaalofa ai e le Malo o Saina laau su’isu’i ma isi meafaigaluega mo sui auai e lagolago ai le atinaeina o a latou taumafaiga ma ia mautinoa ai le faaauauina o tomai ma agavaa.
O le a tuliloaina foi e le Matagaluega o Tina ma Tamaitai le faatinoga o nei atinae ina ia mautinoa e mafai ona siitia nei tomai i se tulaga e gafataulimaina ma faaauauina.
