Ua 53 nei tausaga talu ona faamauina sootaga faavaomalo o Samoa ma le atunuu o Initia, ma o ia tausaga e tele o loo fesoasoani mai ai lea Malo i le tele o atina’e eseese mo le manuia o le tatou atunuu.
O se paaga foi e vavalalata o tatou sootaga e pei ona iai nisi o pisinisi i le atunuu ua faafoe e ni tagatanuu o Initia ua faamautu i Samoa.
Ua tala foi gafa o nisi o o tatou tagata i nisi o lea atunuu ma ua soo toto ai Samoa ma Initia.
O le vaiaso nei na tauaao ai e le afioga i le Ao o le Malo, Afioga Tuimalealiifano Vaaleto’a Sualauvi II, tusi tofiga o le Sui o le Malo o Initia mo Samoa, le tamaitai o Neeta Bhushan.
O nisi o fesoasoani a lea Malo ua ofoina mo le itu i aoaoga, faapea le soifua maloloina e pei ona iai le polokalame o loo auina atu ai nisi o gasegase mai Samoa e togafiti i lea atunuu tele.
O loo fesoasoani foi Initia i le tomai o fesootaiga i auala o initaneti, faapea sana fesoasoani sa maua e lo tatou Malo i le taimi o le faama’i misela ma le faama’i Koviti-19.
O le tamaitai Komesina maualuga o Initia mo Samoa sa galue i le ofisa o mataupu tau lotoifale a lea Malo mo ni tausaga a o lei tofia e avea ma Sui o lona Malo i lo tatou atunuu.
