O le masina o Mati o le tausaga nei 2025 e atoa iai le 51 tausaga talu ona faamautū sootaga faavaomalo o Samoa ma le malo o Farani, o se tasi o paaga totino a le tatou malo na amata ona tatou faipaaga i le aso muamua o Mati o le tausaga e 1974.
O le tauaao atu ai o tusi taualoa o le tofiga o le amepasa fou o Farani mo Samoa i le afioga i le Ao Mamalu o le Malo na faaleo ai e le sui fou o lea malo o Amepasa Guillaume Lemoine le faatūina o le ofisa o lona malo i Samoa e avea ma pine faamau o sootaga faavaomalo o atunuu e lua ua silia ma le 50 tausaga.
I le saunoaga a le amepasa fou ma le malelega a le Ao Mamalu o le Malo na amana’ia ai le tautua a se tasi o tamaitai o le atunuu ua 25 tausaga o avea ma konesula o Farani i Samoa le afioga Vaimasenuu Zita Martel.
Sa avea Amepasa Lemoine ma sui o le malo o Farani i le atunuu o Papua Niu Kini a o le’i filifilia e avea ma ulua’i Amepasa o lona malo ua galue ma faamautū i Samoa.
Ua lua ai nei malo Europa ua iai o latou ofisa ma sui o o latou malo ua alala i Samoa, o le malo o Peletania ma Farani.
