Ua tapena le usugafono a Samoa mo le fono tele faaletausaga e faatatau i mataupu ma’ale’ale o suiga tetele o le tau, o le a usuia i le atunuu o Aikupito i le masina fou o Novema, ma e tāua ai tele lava tapena o sui auai o le tatou usugafono i feagaiga faavaomalo ma mataupu e fesootai i lea fono tāua.
Ua faailoa e le Minisita o le Matagaluega o Puna’oa Faalenatura ma le siosiomaga le afioga Toesulusulu Cedric Schuster, o le malamalama i mataupu i suiga o le tau o le a mafai ai ona maopoopo se leo o atunuu mai le Pasefika aemaise o se sao o Samoa e folasia i luma o Malo o le lalolagi pe a tauaofia lea fonotaga faavaomalo ua ta’ua o le COP 27.
O le vaiaso nei sa feiloai ai sui o lea matagaluega ma matagaluega o le va i fafo ma fefaatauaiga faapea faalapotopotoga tuma’oti o loo lotolotoi i galuega tau i suiga o le tau, e faatalanoa le tulaga tāua o le manino ma silafia lelei o mataupu e fesootai i le autu o lea fono faavaomalo ina ia lava taoso ai ni manatu e folasia i lea faatasiga tele a atunuu o le lalolagi.
O Samoa o le isi atunuu o le faalapotopotoga o atunuu laiti o le lalolagi o loo tu malosi i le tauaveina o le mau o le tatau i atunuu malolosi o le lalolagi ona faaitiitia a latou kasa oona, o loo salalau atu i le vanimonimo ma aafia ai le lalolagi ona o se tasi o mafuaaga o suiga ma’ale’ale o le tau, ua aafia ai tamaoaiga ma le soifua lelei o tagata o atunuu laiti, aemaise o aafiaga mai mala faalenatura.
