O le faamuamua a le faamasinoga ua ave i le tagofia o tagi o le palota ma ua faailoa ai i le fofogaina o matāupu tau faamasinoga o le palota mai le itumalo o Falealili 1 ma Falealili 2, e tatau ia i latou o faasaga iai moliaga ona auai e faafofoga i tuua’iga ma taualumaga o su’esu’ega molimau.
Ae sa tuuina atu ni talosaga a loia o loo tula’i mo le afioga i le Minisita o Faato’aga ma Faigāfaiva o le sui faipule o Falealili 2 faapea se talosaga a loia mo le Sui Palemia ma le faipule o Falealili 1 i se isi avanoa e tolopō ai le matāupu ona o ia minisita o loo auai i le fono a le Palemene o loo talanoaina ai le tala faatatau autū o le tupe ma e mana’omia e tali i ni fesili e aga’i atu i le malo.
Na faailoa e le loia le afioga Mauga Precious Chang i le faamasinoga o le aso 29 o Oketopa o loo faamoemoe e mae’a ai ona talanoaina le tala autū o le tupe ma pasia ai, peita’i sa lē talia le talosaga ae ave le fautuaga i loia e faailoa i minisita le faatāua a le faamasinoga ua ave i le tagofia o tagi o le palota.
O le a faaauau ona su’esu’eina le tagi a le sui tauva tama’ita’i i le faigā filifiliga a Falealili 2 le afioga Fuimaono Maria Tuatagaloa Meredith i le Aso Lua o le vaiaso fou.
O le tasi o tagi o le palota mai Falealili 1 lea o loo molia ai le sui faipule o le Sui Palemia le afioga Toelupe Maoiautele Poumulinuku Onesemo, o loo atugalu foi le faamasinoga i le lē auai atu e faafofoga i le su’esu’eina o molimau.
Ua teena ai le talosaga mo le tolopōina o su’esu’ega se’ia mae’a ona pasia le tala autū o le tupe, ae o le a amata valaau molimau i le vaiaso fou i molimau e to’alua a le itu tagi o loo fuafua e fia malaga ese ma Samoa.
Ua iai le fuafuaga pe oo atu ai i le Aso Lulu ua mae’a le tala o le tupe ona faatasi atu lea o le sui faipule o Falealili 1 i le faamasinoga.
