I le tele o aso o fetaia’i pea nisi o faaitu o Aotearoa nei ma uiga loulouā o le tau, o lea ua lipotia mai le leiloloa mai ai o ni tagata se to’alua mai se aiga e tasi, ina ua aafia lo latou fale i se eleele solo ma lōlōga tetele i Welcome Bay, i Tauranga, i le po o le Aso Lulu.
Faamauina i lipoti mai le NZ Herald, poo le kuata e te’a ai le fa (4:15pm) i le taeao o le Aso Tofi na māua ai e leoleo lenei matāupu ma na faailoa atu i le auaunaga tulaga pagātia ua iai le fale.
E to’atasi se tagata ua avatu i le falema’i mo togafitiga, ona o ni manu’aga tugā.
Ta’ua le faanatinati ai ona aga’i ese aiga tu tuaoi i le fale ua aafia, mo puipuiga, e pei ona maitauina le lē mālōlō o sui o auaunaga o faalavelave tutupu faafuase’i a o malolosi mai ai matagi ma mamafa timuga ae faapea le faigatā ona uia le tele o faaitu talu ai lōlōga.
Faamauina e leoleo, poo le toe 10 minute i le 4 i le vaveao na valaau ma talosagaina ai e leoleo le fesoasoani a le Vaega o Puipuiga le New Zealand Defence Force ina ua oo atu faamatalaga ma lipoti, o loo iai ni tagata e lē o mafai ona oese mai i fafo o se taavale, e lē o mafai ona minoi ese mai ona o le malosi o lōlōga ua iai i Welcome Bay.
O lea ua fautuaina ai e malu o le malo tagata o loo iai i le itu i Sisifo o Bay of Plenty ina ia tautuanā le saogalemū, ia faaitiitia le soona feoa’i, aemaise foi tulaga o loo tapunia ai le tele auala talu ai lōlōga ma eleele solo.
O loo lipotia mai pea le tapunia o le tele o auala ma o loo tapunia Welcome Bay mai le uia mai le va o Waitao Road ma Te Puke Highway, ae o loo tapunia le State Highway 2 i le tele o nofoaga, e aofia ai Apata mai le va o Tanners Point ma Katikati faapea Paeroa and Waihi.
I le itu Mātū o State Highway 2 i le va o Matawai ma Ōpōtiki o loo tapunia faapea SH35 i Okitu ma Pōtaka.
Ua lipotia mai foi le motusia ai o le eletise i le tele o itu o Welcome Bay, Mount Maunganui, Bethlehem, Brookfield, Bellevue ma isi pitonuu.
Ae o lea ua faaalia e le MetService a Niu Sila le faalēaogāina ai o lapata’iga o timuga mamafa e pei ona iai i le lanu mūmū mo nisi o vaega o le atunuu, ae o loo iai pea lapata’iga i le lanu moli mo Gisborne ma Hawke’s Bay.
Puna o Faamatalaga: https://www.nzherald.co.nz/nz/bay-of-plenty-storm-multiple-sh2-closures-and-evacuations-after-heavy-rain/TLWQGTAEJVGDRONVDJUAP345HU/
