A o faasolo ai faigāpalota laitiiti a le itumalo o Papatoetoe, ua faaalia tulaga o le pa’ū maualalo pea o le numera o tagata e palota o se tulaga ua faaalia ai popolega.
Faamauina e na o le 16.8 pasene o tagata e tatau ona palota ae ua toe o ni nai aso ona faamuta lea o le faigāpalota.
O lenei faigāpalota na faatonuina e le faamasinoga le toe faatino ina ua faamaonia le lē moni ma le lē sa’o o le faigāpalota na faia i le 2025, talu ai le tele o faamaumauga ua lē ogatusa ma le faatinoina o le faigāpalota e aofia faiga faaālatua.
Ta’ua e nisi o ta’ita’i, o gaioiga ua lē talitonuina ai e tagata lautele le faatino ai foi o faigāpalota.
Faaalia e se tasi o sui o Manukau i le pulega, Alf Filipaina, e lē tau fesiligia le pa’ū maualalo o le numera o tagata e palota ona o ata lava lea o le lē faatuatuaina e tagata o le faatinoga o faigāpalota, faaopoopo foi iai ma le tele o faafitauli ua alia’e mai e pei o le siitia o le taugatā o le soifuaga faapea ai ma le tele o fuafuaga a tagata e pei ona iai le mālōlōga umi o le Eseta.
O ia tulaga, o lea ua fautuaina ai ta’ita’i o faaitu eseese ina ia toe iloilo auala o loo faatino ai faigāpalota e aofia ai ni auala fou e suia ai palota a tagata ia o loo tuu ia latou pusameli (postal voting).
Faaalia e le Auckland Council o loo faasolo pea faalauiloa e fautuaina ai le to’atele ina ia palota.
E faamuta le palota mo Papatoetoe i le vaiaso fou i le aso 9 o Aperila.
Puna o Faamatalaga: https://www.rnz.co.nz/news/national/591313/papatoetoe-election-turnout-only-one-in-six-have-voted
