O le naunau o le autapuai i lana Toa Samoa ma ana taaloga, na matua molimauina i tafaala o le taulaga i Apia i le aso ananafi. O vaaiga tutusa foi na sa vaaia i nisi o pitonuu o Aukilani i Saute i le vaiaso talu ai.
O se molimau mai le sui o le Radio Samoa i le atunuu, o se vaaiga ese na iai le afiafi ananafi i le taulaga i Apia a o feoai solo tagata ia latou taavale, faaee solo pu ma taualaga e faaali le latou lagolago ma le tapuaia o faiva o alo ma fanau o le a tauina le taua i le vaveao ananeila.
O le fiafia lea o le tapuaiga a Samoa ua tau galo ai foi i le autapuai le mamalu o le Aso Sapati ae ua le taofiofia le agaga fia lagolago, ma ua tau lelei ai lana tapuaiga ina ua a’e manuia faiva o le Toa Samoa i le la taaloga ma le ‘au a Farani i le aso ananafi, i lana manumalo maoa’e i ‘ai e 62 le Toa Samoa i le 4 a Farani.
Na molimauina le oo atu i ai o malu o le malo peitai sa tuu avanoa pea i le autapuai e faaali lo latou fiafia e alalaga solo ma faalealea le tagavai a le atunuu, a o auai e mataituina le tulaga saogalemu o mea i le aso ananafi.
