O le isi fusuaga o loo loma nei a le alii o Jai Opetaia o le a fetaui ai ma le alii fusu o David Nyika.

E pei ona silafia e le to’atele e lei iai lava se faia’ina a Opetaia mai ana fusuaga e 26, 20 o ia fusuaga na malo ai e le’i uma taamilosaga.

O le upega tafa’ilagi a le Sports Casting.com o loo ta’ua ai e ono avea Opetaia o le tama fusu aupito sili i le lalolagi, 200 pauna ma o loo sologa manuia foi ana taumafaiga ma le faasologa o ana fusuaga.

O Opetaia o loo avea nei ma siamupini i le Cruiserweight a le IBF ma le Ring magazine.

E to’atele e manatu o le a manumalo Opetaia i le fusuaga lea i le Aso Lulu peitai e lē o tuumāmāina foi e lana paga le alii o David Nyika lea e le’i iai foi sana faia’ina mai fusuaga e 10, malo i fusuaga e 9 e le’i uma taamilosaga.

Ile faatalanoaga o alii fusu ia i le Youtube i le vaiaso nei na tau faj tautino ai ua sauni mo le fetauiga lea i le Aso Lulu ma o le faamatalaga a Nyika o se miti lea o le a taunuu mo ia, o lona faamoemoega ia faato’ilaloina le tagata aupito lelei i le fusuaga ma o lea ua maua lona avanoa e faataunuu ai lana moemitiga.

Fai mai Nyika e leai sona talaaga i fusuaga ma e fou ia te ia le tele o mea ae o le avanoa ua ia maua o le a lē ma’umauina.

O le faamatalaga a Jai i le faatalanoaga o David o se tama lelei peitai ua oso ane i le ala o loo alu atu ai o lona uiga e mana’omia ona aveese.

Fai mai le alii siamupini, e faato’ā malo le tagata i le mae’a o le faatinoina o le galuega faigata ma ua mata’itū nei e le faitau afe o tagata le i’uga o lea fetauiga o le a faataunuu i le po o le Aso Lulu nei i le Gold Coast Convention Centre.

Puna o Faamatalaga: https://m.youtube.com/watch?v=YGFqMvsENUw&pp=ygUaamFpIG9wZXRhaWEgdnMgZGF2aWQgbnlpa2E%3D