O le numera poo le aofai o tamaiti ua faia tuipuipui i Aukilani o loo tumau pea ona iai i se tulaga e le o mautonu e pei ona saunoa ai se tasi e tele sona silafia i lea mataupu.
O faamaumauga mai le matagaluega a le soifua maloloina e aofia ai le piliota mai le aso 1 o Iulai agai ai ia Setema 30 o le tausaga talu ai ua faailoa ai e na o le 65 pasene o tamaiti i Counties Manukau ua mae’a ona faia uma tuipuipui e oo i le ono masina talu ona fananau mai.
O Dr Nikki Turner o le faatonu o le vaega faafomai i le iunivesite o Aukilani le Immunisation Advisory Center na ia ta’ua e ui e ono mafai ona faaleleia le tulaga lea i tui puipui, ae e matua manaomia lava le fesoasoani i lea tulaga.
Fai mai a ia i le taimi o le faamai Koviti-19 sa tau fai galulue uma ai auaunaga tau le soifua maloloina i soo se atunuu i isi foi mataupu tau le soifua maloloina ma o i o loo aliae ai ma faaletonu i tulaga ia e pei o le faia o tuipuipui.
E manatu Turner e le tatau ai ona tuu ai pea e faaletonu le tulaga lea tau tuipuipui ona o se tasi lenei vaega tāua o le puipuia o le soifua o le tagata.
Na faailoa foi e le tamaitai fomai o le popolega tele i Niu Sila lava ia o le misela e pei ona maitauina i le 2019 na silia ma le 2 afe tagata na aafia ai ma o le toatele o i latou ia e lei faia ni tuipuipui.
O tuipuipui o le tamaititi i le faatoa fanau mai e aofia ai ma le tui o le misela, mami, rupela ma isi faamai e pei o le tale vivini, polio, flu ma le Koviti-19 e pei ona iai nei ma e ao ona faataunuu ia tui mo le malupuipuia mai ia faamai.
