Ua toe foi le aufaigaluega a le umukuka o le maota gasegase o Tupua Tamasese Meaole i Motootua e faaauau le latou tautua i le saunia o taumafa mo gasegase o loo taofia i le falema’i autū o le atunuu, ina ua mae’a ona feiloa’i ma le Minisita o lea matāgaluega ma soalaupule ai le matāupu i o latou itula faasili poo ovataimi ua sefulutasi totogi e le’i maua lava.
Ua faaalia e le Sui Palemia i le fono ma tusitala, e tatau ona maua ovataimi o tagata faigaluega a le malo mai seleni o fuafuaga tau tupe faanatinati o loo faafoe ai nei galuega a le malo le emergency budget, ona e lē o aiaia i le tala faatatau autū o le tupe fou o le a talanoaina i le vaiaso nei, seleni totogi mo ovataimi e amata mai ia Iulai o le tausaga nei, se’ia oo atu i le aso 30 o le masina lenei o Oketopa lea e faamuta ai le faaaogāina o tupe a le malo i tulaga faanatinati.
Le afioga i le Sui Palemia, afioga Toelupe Maoiautele Poumulinuku Onesemo.
O le Aso Lulu o le vaiaso nei e tauaofia ai le fono aoao faitulafono mo le amata talanoaina o le tala faatatau autū o le tupe.
