Ua faaalia nei le lagolago a le tamaita’i faia’oga o le ‘au a le Silver Ferns Yvette McCausland-Durie, i le augani a le tama’ita’i taalo o le ‘au netipolo a Niu Sila ia Grace Nweke i le moomia ai ona toe aumai i totonu o lē sa avea ma faia’oga ulu o le ‘au, Dame Noeline Taurua.
Na faatino e le tama’ita’i taalo ia Grace lana faamatalaga i le mae’a ai o le latou taaloga ma le ‘au a Aferika i Saute i le taamilosaga mo le Ipu o le Taini Jamison Trophy.
Mo le silafia, na vāvāō lea foi taaloga ina ua faamālōlõ faafuase’i ai o le tama’ita’i faia’oga ia Dame Noeline Taurua, ae toe o se aga ona faatino lea o le taamilosaga e pei ona mae’a faatautaia nei.
Lipotia le faia ai o se iloiloga a le laulauafono i le faia’oga ulu, ona o faaseā a nisi o teine o le ‘au, ma le tala ua tauāu ina lē saogalemu i latou ma le si’osi’omaga o iai ona o Dame Noeline Taurua.
O se faai’uga na feeseesea’i ai manatu o le to’atele o teine taaalo ma nisi o teine tuai o le ‘au a le Silver Ferns e pei o le tama’ita’i o Laura Langman.
Na faailo e Grace Nweke, ua o latou misia ma lo latou alolofa pea mo le tama’ita’i o Taurua, ma faailo ai foi lo latou lagolago mo ia a o iai i taimi faigatā.
I nisi o lipoti o le asō o loo faamauina le ono toe feiloa’i ai o Dame Noeline Taurua ma le Netball NZ e masalomia o le a toe talanoaina ai tulaga o se faia’oga ulu mo le ‘au.
O Yvette o loo avea ma faia’oga mo se taimi lē tumau a o fetuuna’i ai pea le matāupu a Dame Noeline Taurua.
