E lei ma’umau se aso o le pulenuu filifilia a Aukilani, Wayne Brown.
O le mae’a fofola ai o api ma tupe a le Auckland Council ananafi i luma o Brown o lona uluai aso foi lea i le ofisa na sau ai ma le valaau ua tatau foi ona alu Paul Majurey poo ia lea o le pule sili o le Eke Panuku.
E pei ona ta’ua i tala fou ananafi o lea ua faamavae le pule sili o le Auckand Transport, Adrienne Young-Cooper, ma fai mai Brown ua tatau foi ona faia e Paul le mea lea e tasi.
O le faaiuga a le pulenuu filifilia o loo fua lea i le laitiiti o tupe maua o loo sau mai le Eke Panuku i tausaga taitasi pe a faatusa i le faitau miliona o loo ia mauaina, poo tupe nei a ratepayers.
Ae i se tali mai a le pule o le Eke Panuku i tala a le Herald, o loo iai lona manao e fia feiloai ma Brown ma talanoa galuega lelei a le Eke Panuku o loo faia mo Aukilani.
O loo faaauau fonotaga a le pulenuu filifilia o Aukilani i le vaiaso nei, ma o le asō o loo fuafua e feiloai ai ma councillors na faamanuiaina i le palota faaitumalo a Aukilani ma talanoa tulaga tau tupe faapea itu e ono lamatia ai fuafuaga faataatitia.
Afai ae alu le pule o le Eke Panuku, o lona uiga ua toalua iai faalapotopotoga suia faauluuluga mai le lima o loo pulea e le Auckland Council.
