E le o lava fesoasoani tau tupe e tauala mai le Civil Defence payments lea o loo totogiina atu i tagata Aukilani ua aafia ona o lologa.
O le manatu lea o le sooupu o le pati a le Green, Ricardo Menendez March ma ua fai mai ai e tatau ona faaluaina le maualuga faatapulaa.
O peimeni nei o loo tauala mai le Work and Income, ma o loo fesoasoani i meaai, fale le tumau o loo nonofo ai tagata o loo aafia, lavalava atoa ai ma totogi o tagata faigaluega na aafia ona o lologa i Aukilani.
O peimeni nei e eseese aofaiga ma o le tagata e toatasi e mafai ona maua le oo atu i le $400 e totogi ai meaai, lavalava ma isi mea o moomia mo le aiga.
Mo le ulugalii poo le matua e toatasi ma e toatasi i le toalua tamaiti e $900, ma matua poo le matua e toatasi e toatolu fanau agai i luga, e agavaa i le oo atu i le $1,100.
O peimeni sa toe iloilo i le tausaga talu ai, ae na saunoa Menendez, o loo malamalama o le aofaiga lava lea sa totogi mo meaai ma lavalava talu mai Iuni o le 2013.
E le o lava i le vaai a Menendez ma ua fai mai ai ua tatau ona faaluaina le aofai e mafai ona agavaa ai tagata aemaise lava i aiga toatele ae o loo maualalo tupe maua.
E le talitonu le sui o le Green o se siitaga afai ae tupu e faapea o le a aafia ai le paketi, auā e le o ni peimeni e faaauau o lea e na o le faatasi ona maua.
