Ua tatau i le malo ona faamanino mai poo le ā le tonu o le faia pea o masks poo ufi fofoga.
O le talosaga a le Retail NZ a o nenefu ai ma ua avea ma mataupu e feeseesea’i ai nisi o tagata faatau ma le aufaigaluega.
A o iai pea Niu Sila I le mōlī lanu moli o puipuiga o le Koviti, o loo faamalosia le faia pea o ufi fofoga i luga o faigamalaga a vaalele feoa’i i totonu o le atunuu, o femalagaa’iga lautele, nofoaga faitele e iai faletusi ma fale mataaga, atoa ma le o i faleoloa seia vagana ai ua iai se exemption poo se faatagana faapitoa e lē mafai ai.
Peitai mai le Retail NZ, e i lalo ane o le tasi vae tolu tagata i totonu o le atunuu o loo faia pea ufi fofoga pe a agai i faleoloa.
Ua talitonu ai le Retail NZ e lē o manino tulafono o iai nei ma ua moomia ai le faamāmā o le faamalosia o le faaaogā o ufi fofoga pe a o i faleoloa.
Ae i se tali mai a le minisita o le Koviti, Ayesha Verrall ananafi na ia toe faamanatu le tāua o le faia pea o ufi fofoga e lē gata mo le Koviti ae o le fūlū o loo pepesi.
E le’i saunoa mai le minisita pe faamata o toe iloilo e le malo tulafono o le faia pea o ufi fofoga.
