Ua mavae le 865 aso, poo le silia ma le 2 tausaga talu ona tapunia tuaoi faavaomalo o Samoa, o le asō ua toe tatala ai.
O le asō le uluai aso o Aokuso, ma mai le maketi aupito i to’atele turisi o loo auala atu ai i Samoa poo Niu Sila nei, o lea ua oo i le aso 23 o Aokuso le leai o ni avanoa o vaalele a le Ea Niu Sila, ae o le pasese one way poo le na o le alu i Samoa ua silia ma le $1,000.
O le uluai faigamalaga mai Niu Sila nei o le a tulaueleele i le malaevaalele faavaomalo i Faleolo o le a malaga ai le Palemia o Niu Sila, Jacinda Ardern ma sui o le malo ma o lea faigamalaga e alu i le vaalele a le Defence Force.
Ae o le uluai faigamalaga mo tagata lautele e faato’ā alu a taeao, ma i faamaoniga mai le kamupani vaalele a le Ea Niu Sila o se faigamalaga faapitoa e lē gata o le a faafaigaluega ai na o tagata Samoa ae o le a maua uma foi ulalole a le pasese e faamanatu ai le uluai faigamalaga toe foi i Samoa a o toe tatala ai tuaoi faavaomalo o Samoa.
Ua maua e tala fou e lē o tuumāmāina foi e Samoa tapenaga o loo faatali mai ai faigamalaga a o toe tatala ai tuaoi faavaomalo o si o tatou atunuu.
