Ua maua nei se nofoaga mautu ma ua tatalaina le lālā fou o le auaunaga a le The Fono, e ala i lona nofoaga autū mo le tufatufaina o taumafa. O le auaunaga tau le soifua mālōlōina mo le Pasefika, le Pasifika Health Service lea e faamautu i Niu Sila nei e ana le lālā lea ma o Mt Wellington lea ua faamautu ai nei.
Fai mai se faamatalaga a le faauluuluga o le The Fono, Tevita Funaki o le nofoaag e tele ma talafeagai mo le teuina ma le tuufaatasia o sapalai o taumafa e fesoasoani ai i le faitau selau o aiga i vaiaso ta’itasi.
O le sauniga foi na tatala ai lea lālā i le Aso Faraile na te’a nei na faalauiloa ai foi ma se tasi o auaunaga fou a le Fono ua faaigoa o le Lagiola, e aga’i sa’o i auaunaga tau gasegase o le mafaufau, mental health ma e silia ma le 100 ta’ita’i o le komiuniti Pasefika sa auai atu ai i lea faamoemoe faapea sui o le malo.
O Sir Colin Tukuitonga sa faia le lauga autū o le faamoemoe o ia foi o le sui faavae o le The Fono lea na faatūina i le 1987. O loo ta’ua i le lipoti o Ofeira Taulealeausumai o loo faauluulu iai le nofoaga fou lea i Mt Wellington.
