Ua toe lua masina o totoe mae’a lenei tausaga, ae o loo faasolo pea fuafuaga a itumalo faapalota o le atunuu i le tatalaina o latou ofisa tutotonu o Fono Faavae, e tapuvae tasi iai tonufai ma galuega mo le poloketi tasi le miliona tala.

O le itumalo o Gagaifomauga Numera 3 na umusa i le Aso Toonai na tea nei, lo latou ofisa tutotonu ma o le taitai o le Malo le afioga i le tamaitai Palemia, sui Palemia ma minisita o le Kapeneta faapea minisita lagolago sa faatumutumu iai mamalu maualuluga i malo valaaulia, sa latou molimauina le mae’a o lea galuega aemaise o se tasi o galuega o le vai taele.

O ia galuega ua fausia i Malaetilofia o tua o Finao o nisi o malae faitaulia o Puleono i Salafai. 

O le taualuga o le tatalaina o le ofisa tutotonu o le Fono Faavae a le itumalo o Gagaifomauga Numera 3 o faaaloaloga ma le taumafataga. 

Faamanatu e Sagaga 4 le 60 Tausaga o le Tutoatasi

O le Aso Faraile foi na tea nei i le itumalo faapalota o Sagaga 4 sa faagasolo ai polokalame o le samiina o le 60 tausaga o le tatou Tutoatasi.

O se sauniga sa auai le tamaitai Palemia le afioga Fiame Naomi Mataafa, ma o ia foi na ave iai le faaaloalo na te sisiina ai le tagavai o le Malo Tutoatasi o Samoa.

O faafiafiaga foi sa tapena e le itumalo aua le faailogaina o le onosefulu tausaga o le tutoatasi.

Na sami le onosefulu tausaga o le tutoatasi e Sagaga 4 ma faalauiloa ai ma fua o faatoaga a le itumalo i le latou Talomua.