O le tuua o Samoa e le ta’ita’i o le Malo le afioga i le Tamaitai Palemia Fiame Naomi Mata’afa, e lē gata o se avanoa muamua ua malaga ese ai mo le auai i fonotaga faavaomalo ma ta’ita’i o Malo o le Pasefika, ma le ta’ita’i o le Malo o Niu Sila, ae ua avanoa ai foi ona ia tatala aloaia le ulua’i ofisa o le Malo Samoa i Fiti, faapea ma le ofisa fou o le Hai Komesina o Samoa i le laumua i Ueligitone i Niu Sila.
O le tausaga e 2020 na amata fausia ai lea galuega i se tupe mai le faalapotopotoga o tupe tausi tau mavaega le UTOs poo le Unit Trust of Samoa. O se vaega lenei o le saunoaga autu mai le tamaitai Palemia o le atunuu i le tatalaina o le ofisa fou o le Hai Komesina o Samoa i Ueligitone i faasalalauga tuusa’o a le Radio Samoa mai le laumua.
“O mafui’e tetele i Kaikura i le 2016 na faaleagaina ai nisi o vaega o le fale tuai. Na talia e le malo le fautuaga a le afioga i le Komesina Sili ia Leasi, ua tatau ona faagaioi le fausiaina o se tatou ofisa fou. O ata o lenei fale na saunia e le CCM Architects mai Ueligitone nei. Ona o le tulaga o le tatou ofisa nei o loo tu i totonu o le sone ua faapitoa mo fale nofo mo tagata lautele, o lea sa umi ai se taimi o tau saili se pemita mai le Wellington City Council e fausia ai lenei ofisa. Sa manaomia maliega mai aiga uma o loo tuaoi ma le tatou fanua nei, ina ia mautinoa ai e lē afaina o latou fale i le taimi na amata ai le fausaga o le ofisa……
…..I le maua ai o le pemita i le 2019, sa valaaulia ai loa tusi talosga mai kamupani faufaule mo le fausiaina o le tatou galuega. O le kamupani a le Willson mai Construction mai Ueligitone, na manumalo i le tauofoga, ma sa amata ai loa le fausiaina o le tatou galuega i le masina o Iulai i le tausaga 2020. Sa iai lava le fuafuaga e faamae’aina lenei galuega ia Mati o le tausaga nei, peitai ona o aafiaga i le faama’i, ua lē mafai ai ona ausia lea sini. O le sauniga o le asō, o le faailogaina lea o le galuega ua tau lalata ona faamae’a ma ua faaaogā le malaga mai i lenei asiasiga e faatino ai lea tulaga ma le faamoemoe o le a faamae’a lelei uma le galuega i isi masina e lua o loo totoe. O le tulai mai o lenei galuega matagofie, o se pine faamau foi lea e faailoga ai, e lē gata i le 60 tausaga o le tatou malo tutoatasi, ae o le 60 tausaga foi o le tatou feagaiga faauo ma Niu Sila. O le ata o le fale o loo iai foliga ma faaaliga e atagia ai nisi o tu ma aga a Samoa. O le avanoa lelei lenei e toe momoli atu ai le faafetai tele a le tatou Malo mo la outou lagolago malosi i galuegafai a le atatou ofisa o le Komesina Sili i le laumua nei. Faafetai foi mo lo outou alolofa faifai pea mo aiga o loo tapuai mai i Samoa. Ia faamanuia mai le Atua i lo toutou aumau ai i lenei atunuu.”
O le mae’a o polokalame o le asiasiga taualoa muamua a le Palemia o Samoa i Niu Sila o le a malaga ai i le fono a ta’ita’i o Malo o le Taupulega e faia i le atunuu o Rwanda i le vaiaso fou.
