O le faaiuga o lenei vaiaso i le Aso Toonai ua faamoemoe e tatala aloaia ai le ofisa tutotonu o le Fono Faavae a le itumalo faapalota o Faleata Numera 4 lea o loo tulai mai ai le tofa Ale Vena Ale i le tofi faipule.
Ua faaopoopo atu le tatalaina o lea galuega i ofisa tutotonu o Fono Faavae a nisi o itumalo faapalota ua mae’a ona fausia ma tatala aloaia mo le faaaogaina, i galuega o le poloketi tasi le miliona tala.
O le ofisa tutotonu o le Fono Faavae a Faleata 4 ua fausia i le ituala i tai o le afioaga o Toamua i le nofoaga sa iai le fale komiti i tausaga ua mavae, e lata i le vaitaele o le afioaga sa toso ai lo latou fautasi sa tausinio i faigamea i le tai i Teuila ma Sisigafu’a i tausaga ua mavae.
Ua faailoa e le tofi faipule o lea itumalo le agaga fiafia ua mae’a le galuega o le ofisa tutotonu o le a tapuvae tasi uma iai galuega mo le manuia o lona itumalo.
