Ua faamaonia mai nei le tatala ai i tua mai le falepuipui o le tamaita’i o Sarah Hope Schmidt, 25 e tausaga le matua, i le mae’a ai o le 9 masina o nofosala i le to’ese i le maliu ai o le alii o Caleb Baker e 22 tausaga le matua.
O se matāupu na faaalia ai le lē fiafia tele o le aiga o Caleb, talu ai foi o le leai o se fesoota’iga ia i latou mai le faamasinoga ma le Auaunaga o le Falepuipui e tusa ai ma le tatala ai i tua o lē na maliu ai lo latou tagata.
Ua fesiligia ai foi e le aiga o Caleb, le sa’o o nei ituaiga faai’uga aemaise o le tulaga ua oo ai i latou i le maliu ai o si o latou atalii.
Mo le silafia o lenei matāupu na tula’i mai i le tausaga na te’a nei 2024, i le masina o Fepuari, ina ua so’a e le loli na aveina e Sarah Hope Schmidt.
I talaaga o lenei matāupu, na aga’i Sarah i sana galuega, i le aveina o se loli i le auala i Hawkes Bay, ma e faapea a o ia aveina le loli, e 44 lelei minute o talanoa i lana telefoni, mai le va o le Dannevirke ma Napier Port ae tula’i loa ma le faalavelave, ina ua so’a e le loli le pito i tua o le taavale a Caleb sa i ona luma.
Faamauina na maliu lava le alii o Caleb i le taimi na tupu ai le faalavelave, ma e ta’ua e toeitiiti lava a taunuu sia talavou i lona aiga ae tupu loa ma lenei faalavelave.
I lipoti na faamanino ai o le mata’utia o aafiaga o le lavea na aafia ai Caleb, ma aafia ai foi le isi tagata avetaavale sa i luma atu lana taavale o le sā a Caleb.
E tusa ai ma taualumaga o iloiloga a le laulauafono a le Palola, na o latou faailoa ai le salamō moni o le tama’ita’i na molia i le mea ua tupu.
Ma ua mae’a ona faasolo ana a’oa’oga e 22 ma sui o foma’i o le mafaufau (psychologist), ma ua faamanino e nei foma’i e lē o iai se tulaga e ono faapopoleina ai le lautele i lea tama’ita’i ma le tatala ai o ia i tua.
Ma o le ala lea na talia ai le tatala mai i tua o Sarah Hope Schmidt i le mae’a ai o le na o le 9 masina na tuli mai le 2 tausaga ma le 4 masina o lona faasalaga.
O le alii o Caleb sa galue mo le Fulton Hogan ma o se tagata talenia i le taaloga o le lakapi.
Puna o Faamatalaga: https://www.nzherald.co.nz/nz/truckie-sarah-schmidt-who-killed-caleb-baker-on-hawkes-bay-expressway-released-from-prison-after-nine-months/MQEGDUIN2BAD7CQHPZI5SMJF4Y/
