Ua tatala nei i tua mai le vaaiga a leoleo sa loka ai i le falepuipui i Tanumalala le to’atolu o tagata ua molia i le umia ma le faaulufale mai i Samoa o le nakoti o le aisa, lea ua faamauina o le aisa pito tele lea e tusa lona mamafa ma le 10 kilokalama ua faaulufale faasolitulafono mai i lo tatou atunuu.
O le tagata pito matua o le to’atolu lea o se tamā ua 74 tausaga o lona soifua o Roderick Ignatius Mackenzie, ma tagata faigaluega e to’alua o se pisinisi faleoloa i Lotopa na aumai iai lea nakoti, o i la’ua ia o le taulealea o Peter Hanipale Malae ma le tamaitai o Jacinta Selafi Chung Kwan.
Ua talia e le faamasinoga talosaga a loia a i latou ia e tatala i tua e aunoa ma le tuuina atu o ni a latou tali se’i faamautū uma moliaga a leoleo.
Ua tatala la i tua ma aiaiga ina ia faamautū le tama o Roderick ma le alii o Peter i Lotopa ae o Jacinta e faamautū i Toamua.
Ua poloa’ina foi le tuuina atu o o latou pepa malaga ma tusifolau e taofia ma saini faalua i le vaiaso i le ofisa o leoleo.
Ua poloa’ina foi e le faamasinoga le faia o se taofiga faaletulafono e le mafai ai ese isi oi latou e to’atolu ua molia ona alu ese ma Samoa.
O le aso 24 o le masina nei o Fepuari e toe valaau ai le mataupu lenei mo le tuuina atu o moliaga mulimuli a leoleo ma iloa ai ni tali a i latou ua tuua’ia.
O le nakoti o le aisa ua molia ai i latou ia e to’atolu na maua e ta’ifau sosogi a leoleo ma le masini fā’ata a le ofisa o le tiute.
O se atigipusa uga poo se plastic container na aumai ai ia pauta faasāina.
