O le faatāua ai i Samoa o le vaiaso ua ave ai le faamuamua i le togafitia o le gasegase o le mafaufau, ua ogatasi ma le umusa ai o le nofoaga fou o le faalapotopotoga o le Toomaga mo e puapuagatia, e faapitoa i le ofoina o fautuaga e avea o se fofo i aafiaga o mafaufau o tina ma fanau e sauaina.
O le nofoaga o le Toomaga i Tuanaimato ua faatu ai lea nofoaga na fausia i le agalelei o tupulaga talavou o le Ekalesia a Iesu Keriso o le Au Paia o Aso e Gata Ai i le sitete o Utah i Amerika.
O le nofoaga na amata fausia i le amataga o le masina o Iuni o le tausaga nei, ae ua mae’a i totonu o le 3 masina. O le galuega o le a ofoina i le nofoaga o se fesoasoani taua lea mo tina ma fanau e aafia i sauaga o loo faamautu ma vaaia i le nofoaga i Tuanaimato, o loo pulea ma faagaioia e le faalapotopotoga o le Toomaga mo e puapuagatia.
