Ua faamauina i tala faasolopito o le paea’iga fou 18 a le Palemene o Samoa, o le sui usufono le faipule tama’ita’i o le itumalo palota o Falealupo ua na tatala saunoaga faataupou a sui faipule o le ulua’i taimi lenei ua seei ai i nofoa o latou itumalo.
O le afioga A’eau Tima Leavaiseeta mai le itu faaupufai o loo agaia le malo na lona lua iai saunoaga faalaua’itele o le tala faatatau autū o le tupe.
O le atina’e o le miliona o se tasi o polokalame a le malo ua faafetaia e le tama’ita’i faipule o Falealupo ona na ia faailoa i le Palemene o se atina’e ua tuusa’o atu seleni i tagata o le itumalo e faatino ai a latou taumafaiga o atina’e mo le manuia o tagata o Falealupo.
Se vaega o le saunoaga faataupou i le tala faatatau autū o le tupe a le faipule tama’ita’i o le itumalo palota o Falealupo o loo lagolago i le pati faaupufai o loo agaia le malo, le afioga A’eau Tima Le’avaiseeta.
Na manumālō le afioga A’eau i le palota tele o le tausaga e 2021 i lona suafa Leota, peita’i na faamavae ma le tofi ona o le taunuuga o maliega e māfua i se tagi o moliaga o le palota i lena vaitau.
E tupu lea tulaga e le’i ulufale o ia i le Palemene e faatautō, ina ua faaumiumi le gasegase a malo na māfua mai i le faai’uga o lena faigā filifiliga a le atunuu.
O lona toe tauva ai i le nofoa o lona itumalo i le palota tele ia Aokuso i lona suafa A’eau na toe filifilia ai o ia e Falealupo.
