E 3 vasega o mataupu i le Gagana Samoa o loo faagasolo nei i kuata eseese o le tausaga, pei ona sauni atu ai mo le tatalaina o avanoa lesitala, mo le kuata lona tolu, e amata ai vasega fou i le aso 19 o Setema i le masina fou.
O nei vasega e faaulu fua e leai se totogi, ma e tele ina faatino i luga o upega tafa’ilagi, lua itula, ae tasi le afiafi o le vaiaso, i le 10 vaiaso.
- Faamatai bilingual – Introduction
- Faamatai bilingual – Intermediate
- Faamatai Samoan Oratory Level 4
(Silasila ane i le vaega mulimuli o lenei tusitusiga mo le lisi o faamatalaga o nei vasega)
I le amataga o le tausaga 2022, na toe tatala aloaia ai le auaunaga a le Centre for Pacific Language, poo le CPL, i se suiga fou, ua toe faaigoa ai mai le igoa Pacific Education Centre sa iai i tausaga e tele, ma ua iai nei le latou ofisa autu, i le fogafale tolu, i totonu o le taulaga faatau i Manukau.
E pei ona faailoa mai e le afioga le Faatonu ia Tuiloma Gayle Lafaialii, “O le Centre for Pacific Languages, ua na’o le pau lea o se faalapotopotoga mo a’oa’oga maualuluga faa-Iunivesite (Tertiary), o loo taula’i i le a’oa’oina o gagana ae le gata i lea o le matou sini autu ia olaola gagana, faapea tu ma aganuu a le Pasefika i totonu o Aotearoa Niu Sila”.
(L-R) Meritiana Spandow, Tuiloma Gayle Lafaialii (CEO), Alex Tychinskii, Alfie Prasad
O se tasi o vaega taua o le auaunaga, ua galulue faatasi ai i le lagolagosua ma le faatupeina e le Matagaluega o Tagata Pasefika e pei ona faa-autu ai le latou auaunaga e ala i le aoaoina fua o gagana Pasefika e leai se totogi, o le aoaoina o matagaluega ma faalapotopotoga pisinisi i mataupu o aganuu Pasefika, ma le faaliliuina o tusitusiga ma faamatalaga i gagana eseese o le Pasefika.
O vasega i le gagana Samoa, Fa’amatai bilingual – Introduction e mo matai fou o loo mafaufau e fia avea ma matai, ae o le Intermediate Fa’amatai course e mo i latou e lelei le malamalama i le gagana Samoa ma le faamatai, ae e mananao e fia faaloloto atili le silafia i auala e faatino ai le faamatai.
O le vasega Samoan Oratory Course e mo e matuā sologa lelei le tautala i le gagana auā e a’oa’oina i le gagana Samoa, ma e fesoasoani i le aoaoina o le lauga faamatai, ina ia maua le tomai faafailauga ia faatino, ma fai se lauga i ni meafai a le atunuu e pei o taimi o le ava, faaipoipoga, saofa’i, maliu, si’i, tali o malo ma malo faaaloalogia, o le faaaogāina o alagaupu, ia malamalama i faalupega ma isi tomai eseese faafailauga o le atunuu.
Mo le lesitala mo nei vasega e leai se totogi, taga’i ane i le facebook poo le upegatafailagi a le centerforpacificlanguages.co.nz
