Ua tatala aloaia le Sosaiete ua faaiogaina o le Sosaiete o Tomai Faapitoa Tau Faatoaga poo le Society of Agricultural Professionals e le Minisita o Faatoaga ma Faigafaiva le afioga ia Laaulialemalietoa Polataivao Fosi Schmidt i le ofisa o Suesuega Faasaienisi le SROS.
Ua faavaeina lenei sosaiete ma le faamoemoe o le a galulue e tuuina atu fautuaga i mataupu tau atinae ma suesuega faasaienisi o faatoaga i le atunuu, ae le gata i lea o le a avea ai ma se fola e faasoa atu ai le malamalama i mataupu tau pulega, faapea ai ma le faatupuina atili o lea tomai ma galuega atinae tau faatoaga.
O le taimi nei o loo tele ina faalagolago atu i le malo manaoga nei e tauala mai lea i le Matagaluega o Faatoaga ma Faigafaiva faapea ai Iunivesite e pei o le USP ma le NUS.
Na faailoa e le Minisita o suiga i le Tekonolosi faaonaponei ua agai mai ai ma suiga i le atinaega o faatoaga. O metotia i aso ua mavae e tatau lea ona o faatasi ma faiga fou ina ia ausia ma faatumauina faamoemoega mo a tatou faatoaga.
O lea sosaiete e toaono ua filifilia i le fono faatonu ma o loo valaau atu iai latou o loo iai le tomai tau atinae nei o faatoaga ina ia agai mai e resitala ma auai ma togi maa i lenei faamoemoe e ala i le tomai ua maua aua le manuia alu i luma o le atinae o faatoaga i le atunuu.
Sa faafetaia e le Minisita lea Sosaiete ma le talitonuga o le a telē sona sao i le atinae o faatoaga mo Samoa.
