O le tatala aloaiaina o le vaiaso o le gagana Samoa i Aotearoa e le faalapotopotoga o le FAGASA na saunoa ai le afioga i le Konesula o Samoa i Aukilani, Afioga Afemata Palusalue Faapo II, o ia le lauga autu o le afiafi, na ia toe faalauteleina ai le tāua o le autu ua faaautuina ai le Vaiaso o le Gagana Samoa e faapea, “TAUTUA I LE ALOFA, MANUIA LE LUMANAI”. 

O le alofa e tauia ai mea uma i lenei olaga, o le alofa foi lea ua mafua ai ona a’oa’o fanau ina ia iloa le gagana Samoa, auā fai mai le Tusi Paia e tatau ona a’oa’o le tama e tusa ma ona ala. 

O ā ala? Ala o le Atua. A’oa’o i le tu ma lana agaifanua aemaise o le gagana Samoa. 

O Samoa e faavae i le faakerisiano ana tu ma ana aganuu, ae o le tu ma le aganuu e faaautama i le gagana Samoa. 

O le mea lea tatou te faapea ai, a leai se gagana Samoa ua leai se aganuu, a leai foi se aganuu ua leai foi se Samoa. 

Ae o le aiātatau lea a le tamaititi Samoa, ia a’oa’o lelei i le tatou gagana Samoa. 

O le aotelega o le saunoaga a le afioga i le Konesula ia tatau lava ona a’oa’o fanau i le gagana Samoa auā o lo tatou lea faasinomaga ma lo tatou tofi mai le Atua. 

O le sao o nisi o fanau aoga sa auai i le faatāuaina o le vaiaso o le gagana Samoa sa tauala atu lea ia latou faafiafiaga e pei ona faafiafia ai le aoga tulagalua mai Otahuhu Primary School, aoga mai Fynlayson Primary School, Rosebank Primary School, ae taualuga i le pese na saunia e le faalapotopotoga a le FAGASA. 

O le ta’ui o le polokalame o le afiafi na saunoa iai le afioga i le peresetene o le FAGASA i Aukilani ma Aotearoa le susuga ia Vaitimu Lemanu na ia toe afea ai i lana saunoaga le tāua o le gagana Samoa i fesootaiga a tagata Samoa. 

Na ia momoli foi le agaga o le faafetai i le aufaigaluega paia a le Atua sa auai, o le sui Faipule o magele ia Lemauga Lydia Sosene, o le afioga i le Konesula o Samoa, faapea uluaoga o aoga taitasi ma mātua sa auai e molimauina lea faamoemoe tāua.