Ua lua ai nei tausaga o faatino lenei taamilosaga taitoafitu i le afioaga o Sapapalii ua faaigoaina o le FedPac Mataniufeagaimaleata Sapapalii 7s.
E 18 ‘au a alii mo le lua aso o le a faagasolo ai.
Na tatala aloaia lenei taamilosaga i le saunoaga a le Fofoga o le Maota o le Tofi foi lea a le Itumalo o Faasaleleaga No. 3.
“O le faamaite a le susuga i le faafeagaiga, Esera Esera o le tamā faaleagaga a le afioga o Sapapalii aemaise le Ekalesia ma le nuu ina ia tapu’e olaga atia’e o tupulaga talavou i le taaloga o le lakapi a manuia o se mitamitaga lea i nuu aiga ekalesia ma le atunuu atoa.”
O lenei taamilosaga ua tatalaina i le aso e faamanatu ai le taunuu ai o le talalelei i Sapapalii a le Ekalesia Faapotopotoga Kerisiano i Samoa (E.F.K.S.).
“O le faamoemoe autu o lenei taamilosaga ia o faatasi ma le talalelei ae o se sao foi o lenei nuu ma le Ekalesia.
“O ‘au uma o le a tausinio tautuana ma outou le faamoemoe ma faavae ai lenei taamilosaga.”
O le lagolago malosi a le Malo e tauala mai i le Lakapi Samoa lea o loo galulue i le atina’eina o le lakapi i le atunuu.
Na saunoa ai le Peresitene ia Namulauulu Sami Leota ina ia agai i luma le atina’eina e le gata o le lakapi ae o vaega uma o le taamilosaga.
“Ia lē na o le tapenaina o le taamilosaga ae vaai i le tulaga e talimalo ai ia lelei faailoga ma tulaga faapena.
“O lea e fuafua le komiti ia faaauau pea lenei taamilosaga.
“Ua silafia uma le tulaga o a tatou tama taaallo i le taitoafitu o nisi na fananau mai i totonu o taamilosaga faapenei i tua i nuu ma afioaga.
“O le lu’i lena mo tatou o le a feagai ma taaloga, taalo faatausala ma faatamalii ma ia manuia outou faiva.”
O le taeao analeila lea na amatalia ai loa le taamilosaga i le malae a le Aoga Tulagalua a Sapapalii ma o loo lagolagoina e kamupani lenei faamoemoe.