Ua faamanatu le tasi tausaga talu ona faatoese aloa’ia le malo o Niu Sila i tagata Pasefika ona o osofaiga faia faavaveao faailogalanu, le Dawn Raids.
O le Aso Toonai na faia ai le sauniga i Orakei marae i Aukilani e faamanatu ai lea aso tāua e lē gata i le talafaasolopito o Niu Sila ae o tagata Pasefika i totonu o Aotearoa.
Saunoa le minisita o tagata Pasefika, Aupito William Sio, o ia foi na fofogaina le saunoga autu, o se aso e toe manatua ai, ma vaai i le lumanai o tagata Pasefika ma na molimauina e le to’atele o ta’ita’i Pasefika na iai i lea taeao.
O le faia ai i Orakei o lea sauniga o sa latou ofo na tauala mai i le faatonu ma ta’ita’i o le Ngati Whatua Orakei e fia talimalo i le uluai tausaga o le faatoesega.
I le manatua ai o lea sauniga, o lea foi ua faalauiloa le tusi ua ta’ua – A New Dawn, tusia e Emeli Sione ma o lea tusi o loo faasoa ai i lana ia savaliga ma aafiaga o ia taimi pogisa.
