I le lata ai ina mae’a lenei masina o Oketopa ma taunuu atu i le masina fou o Novema e amata ai le vaitau o afā seia oo ia Aperila o le tausaga fou, o lea ua faailoa e le ofisa vaaitau i Samoa se lipoti faalauaitele mo le silafia e lo tatou atunuu i vaaiga mamao o le Vaitau o Afā mo le tausaga nei 2022 e oo i le tausaga fou 2023.
Ua faailoa i lea lipoti vaai mamao e tasi pe leai foi (0-1) se Matagi Afā e ono alia’e mai ma pasia pe sopoia foi le 400 kilomita i fafo atu o Samoa i lenei Vaitau Afā.
O le Vaitau Afā o lumanai nei e maualuga se tulaga lamatia o le atunuu mai Matagi Afā ia Ianuari ia Mati nai lo Novema ma Tesema. O le taimi nei, o loo ufitia pea le Vasa Pasefika i aafiaga o le La Nina, ma o le vaai mamao i le amataga o le 2023 o loo valoia ai e faaauau pea uiga o le La Nina.
O loo valoia le faamauina o timuga masani mo Samoa i lenei Vaitau Afā. O lenei vaaiga mamao e faavae lea i suesuega faatusatusa i ni Vaitau Afā mai tausaga ua mavae e tai foliga tutusa ma lenei tausaga.
Ua faailoa foi e le ofisa vaaitau a Samoa o lenei Vaitau Afā o le a vaaia ai le tupu faatolu o le La Nina i ni tausaga sosoo talu mai le Vaitau Afā o le tausaga e 2020 i le 2021.
Ua faaalia e le vaaitau o le ata faatusatusa o vaitau mamao, o loo lilifa i le toe faaauau ai pea o le La Nina mo lenei vaitau atoa, ma e telē sona tāua i le Tau o Samoa, e ui ina maua mai i faamaumauga i le sami i le ogatotonu o lenei tausaga le ono faaitiitia o le La Nina, lea na faatumauina ai pea le faatupulaia o savili mai Sasae ma iu ai ina toe faaauau le La Nina i le masina o Setema na tea nei.
O le vevela o ogasami o loo faatumauina pea i le La Nina, ma a fua i ata faatusatusa mo le vaai mamao, o le a faaauau pea lava i lenei Vaitau Afā.
O faamaumauga mai i le Ea ma le Vanimonimo, o loo iai foi i le La Nina ma ua faamausali atili ai le faaumiumi loa o uiga nei i le agai atu i le tausaga fou. A fua i le tulaga o loo iai i le taimi nei ma le vaai mamao, o le a iai timuga i le tulaga masani poo le sili atu.
O aafiaga o le La Nina e āga eseese i atunuu taitasi o le Pasefika. Mo atunuu Melenisia e pei o Solomona, Vanuatu na Niu Kaletonia e telē le tulaga lamatia i Matagi Afā pe a faatusa i atunuu e pei o Fiti ma atunuu Polenisia i le itulagi i Sasae, e laiti numera o Matagi Afā e afea. Mo Samoa, o le La Nina e faaitiitia ai le numera o Matagi Afā.
O uiga ia o le tau e afua ai timuga mamafa, lologa faafuasei, lologa i nofoaga maualalalo, lologa i talafatai, galu afā, asiosio i luga o le sami ma savili malolosi.
E tele foi le avanoa e tutupu ai eleele solo ma lologa mai vaitafe i lenei Vaitau Afā 2022/2023.
O nisi aafiaga o le La Nina e faateleina ai timuga mai i timuga masani ma e ono tele ai le avanoa e tutupu ai lologa i nofoaga maualalalo, e siitia le maualuga o le siisii o le sami ma e ono faateleina ai le avanoa mo faamai pepesi e afua mai i vaivai to’a.
O nei tulaga uma e ono lepetia ai le soifua ma faaleagaina ai mea totino. O le a faaauau pea le mataituina ma le toto’a e le Ofisa o le Vaaitau ni suiga e tulai mai ma o le a tuuina atu faamatalaga talafeagai mo le mamalu o le atunuu.
E fautuaina tagata uma ina ia mataala ma nofo sauniuni a o tatou iai i lenei Vaitau Afā 2022-2023.
