O se tasi faleoloa o le kamupani ua faaigoaina o le Muffin Break, ua molia i le solia o le tulafono ma le faafaigaluegaina o tamaiti e toatolu e lē tatau ona faafaigaluegaina ona e laiti tele, ua tapunia nei ona ua lē mafai ona o latou toe totogi aitalafu e faatatau i le koviti.
O le Rianshi Pty Ltd ua feagai ma faasalaga ina ua molia i moliaga e 360 o le solia o le tulafono o galuega e aofia ai tamaiti, child employment laws.
I le va o Mati ma Oketopa o le tausaga na tea nei na faafaigaluega ai e le pisinisi ni tamaiti tai 14 tausaga e aunoa ma ni pemita faigaluega, o tamaiti na o ane e saili galuega ma o latou faafaigaluega ai loa i latou ia ma e lei iai foi se tasi sa vaavaaia i latou ia pei ona tatau ona iai i lalo o le tulafono.
Sa tuuina ane le faasalaga mai le faamasinoga e $10afe e totogi ma o le masina o Me 2017 na amata ai le pisinisi ma faatau ai e le ulugalii lea le franchise mo le 330 afe, sa feagai foi ma ni luitau i le taimi o le koviti ma o le Aso Lua na tea nei ua lipotia na tapunia ai loa ona fai mai faamatalaga ua oo i le faamasinoga ua aafia le soifua maloloina o le ulugalii ona o aafiaga o tulaga ua iai le pisinisi ma ua nofo aitalafu foi i le Muffin Break aemaise o le rent.
O le faamatalaga a le loia sa feagai ma le mataupu e ao ona matuai faamalamalama lelei le vaega lea o le tulafono e aofia ai le faafaigaluegaina o tamaiti, e le gata ia malamalama le faipisinisi ae faapea foi i tamaiti ma o latou aiga auā e moni o loo manaomia le fesoasoani tau seleni i le tele o aiga ae tatau foi ona usitaia le tulafono.
