Ua oo mai ai o tala faanoanoa i le tapunia aloa’ia ai o se tasi o polokalame tele, ae o se auaunaga ua loa tausaga o faatino mai, le Youth Search and Rescue (YSAR) pe a mae’a le tausaga faaletupe lenei 2025, ina ua faamaonia mai le feagai ai o lenei auaunaga ma faafitauli tau seleni.
Ta’ua e le faalapotopotoga ua lē mafai ona faaauau ona faatino a latou fuafuaga (growth model) talu mai lava le tausaga 2019.
Ua faamatala e na o le 12% o le seleni e faatino ai galuega e mai pili a’oga a fanau o loo resitala atu mo polokalame faalea’oa’oga nei, e 50% e mai le NZ Search and Rescue, ma o le tele o le seleni e taumafai e maua ai ni fesoasoani e mai ia latou sa’iliga tupe poo fundraising.
O lenei polokalame ua 20 tausaga o faatino mai, ma o se auaunaga ua silia ma le 600 tupulaga talavou ua mae’a a’oa’oga i tomai ma agavaa i itu tau i sa’iliga ma lavea’iga (search & rescue).
O se faanoanoaga i le ta’ita’ifono o lea faalapotopotoga Dr Daniel McGowan, ua lē mafai ona toe tatala le avanoa e resitala ai fanau o loo iai le naunauta’iga e faalaua’itele lo latou malamalamaga ma le iloa i faatinoga o sa’iliga ma lavea’iga i taimi e moomia ai.
Mo tagata faigaluega ua faamanino mai o le a faamālōlō ma le 210 o tupulaga o loo iai nei i lenei polokalame.
Faaalia e le to’atele o sui e ofo fua atu o latou taimi e galulue ai lenei polokalame o latou foi faanoanoaga i le tala ua oo mai, ma faailo o latou manatu, o lenei polokalame e ese le tāua mo nofoaga ma itu e maitauina le matua’i aafia ma ma’ale’ale i faalavelave tutupu faafuase’i e pei o Kalaiesitete.
Lipotia e le leitio faavaomalo a Niu Sila, le faafetaia ai e le Malo o le sao tāua a le Youth Search & Rescue, ma o le a o latou galulue ma nisi o faalapotopotoga ma sosaiete e taumafai e fetuuna’i ni fesoasoani e taumafai e tali atu i lea faafitauli.
