O le masina o Tesema o le tausaga nei lea ua faalauiloa mai e le Kolisi o Uesilē (Wesley College) le tapunia ai o ona faitoto’a mai le toe faia o sa latou nofotumau.
O se fuafuaga ua faataatia nei ma ua tatau ona fai, talu ai le tele o tuua’iga ma matāupu tau i sauāga matagā ma le tele o faafitauli na tula’i mai i le tele o tausaga ua lepeti ai le saogalemu o fanau a’oga.
O se faai’uga na lilifa i le tele o su’esu’ega a leoleo, faatasi ai ma se lipoti na tuufaatasia e le Ofisa Iloilo a A’oga (Education Review Office) – na faaalia ma faamauina ai le tula’i pea o faafitauli i fanau a’oga ma lo latou saogalemu.
Faaalia e ui i se taumafai pea a le kolisi e toe poupou ma faaleleia tulaga uma, ae ua faailo e le laulauafono a le Komiti Faafoe a le a’oga le tatau ai ona faia o ni suiga i faiga faavae ina ia siitia tulaga lelei o si’osi’omaga e lotolotoi ai fanau, a ia mautinoa le malupuipuia o soo se tamaitiiti e ulufale atu i le kolisi.
Faamanino foi – ua faia lea tulaga ona o le mau matāupu tau i sauāga ma faatinoga e faapea o ni gaioiga e masani a’i talu ai tu ma aga a le kolisi (traditions) e pei ona faatino se vaega ua faaigoaina o le “Manhunt” – lea e molimau ai le fasi ma faaoolima ai sui o vasega matutua poo seniors i tamaiti o vaega laiti.
I lipoti e ta’ua i le alia’e ai o faafitauli i le a’oga, o lea na tofia ai loa e le Matāgaluega o A’oga se faatonu o tulafono (limited statutory manager) i le tausaga e 2023 i le faatupula’ia pea o le numera o ē tuuina atu faaseā i sauāga e fetaia’i ma le to’atele o fanau a’oga.
Faamaonia e lata lava i le 300 faamaumauga na maua atu o loo faaalia ai le tele o matāupu tau sauāga, e aofia ai le faaoolima ma uiga matagā.
Ta’ua e le Kolisi o Uesilē, o le a toe tatala le nofotumau pe afai ua mautinoa le lelei o ta’iala mo le malupuipuia ma le saogalemu o fanau a’oga i totonu o le kolisi.
Puna o Faamatalaga: https://www.1news.co.nz/2025/10/20/wesley-college-to-close-hostels-due-to-safety-concerns-for-students/
