Ua le maua lava se isi e faatauina faleoloa o le kamupani tele o le Jenny Craig e toatele e silafia i le latou auaunaga o le fesoasoani i tagata ia lusi kilo pe faaitiitia foi le tino soona puta.
O le masina o Me o le tausaga nei lava na faalauiloa ai e le Jenny Craig Australia o le a faaauau pea ona faia ana fefaatauaiga a o suesue ai e le pulega ni avanoa mo le toe faatulagaina o le pisinisi ina ua faailoa e le latou lala tele i Amerika ua gau le kamupani po ua bankrupt.
O le vaiaso nei ua faailoa ai i sa latou pepa o faamatalaga e ui i le tele o taumafaiga sa feagai ma latou i le sailia o se buyer, peitai ua le manuia ma o le a tapunia loa le auaunaga.
O faleoloa uma o le Jenny Craig i Ausetalia ma Niu Sila ua aafia i lenei tulaga ma ua vāea ai le aufaigaluega.
O le Jenny Craig latou te ofoina polokalame tau taumafa i tagata e fesoasoani ai e faalusi ma e toatele le au fai ata tifaga ma le aufaafiafia sa auai ai i lona faalauiloaina faalauaitele.
