Ua iu lava ina faia le faaiuga e se tasi o faipisinisi i Aukilani o le a tapunia lona faleoloa ona o popolega i le saogalemu ina ua faafitu ona gaoia le pisinisi.
Ua le faatasi se taimi e faalogoina ai mataupu faapenei ma ua faaopopo pea i vaiaso taitasi.
O le tagata faipisinisi o Aboli Bhave mai Aukilani ua fai lana faaiuga e sili ai ia pe a tapuni lona faleoloa o le Post Shop i Titirangi e ui ua 20 tausaga o lana auaunaga.
Ua mafua le faaiuga ona fai mai le faipisinisi ua silia ma le faaono ona gaoia i totonu o le lima tausaga talu ai ma ua avea o se tulaga ua faigata ai ona moe i po ma popole ai i le saogalemu.
Na faatalanoa i le AM si ulugalii e ana le pisinisi ma ua o la ta’ua ua tele mea ua faaleagaina o le pisinisi ma ua tele foi tupe ua alu i le toe faaleleia.
E toatele le komiuniti i Titirangi na agai ane ma faailoa le lagolago mo si faipisinisi ma lona aiga aemaise foi i le taimi faatoa mae’a ai le osofaiga mulimuli o le pisinisi i le masina o Aperila.
Na faailoa finagalo lē fiafia o nisi mai le komiuiti lea ma faailoa ai ua tatau ona tutu faatasi komiuniti e puipui ma fesoasoani i nai tagata faipisinisi auā o loo fesoasoani foi i aiga e ala i faleoloa e faigofie ai ona maua atu oloa manaomia e aiga i aso taitasi.
O loo faia pea nei suesuega i le mau osofaiga o faleoloa o loo lipotia pea i vaiaso taitasi mai vaega eseese o le atunuu.
