O le a tapuni faitoto’a o se tasi o kamupani tele o loo gaosia ma sapalaia mai fuālaau’aina ma fuālaau faisua, le McCain factory i Hastings, ma ua faamoemoe o le a tapuni i le tausaga fou 2027.
O lenei falegaosimea i Omahu Rd, Twyford i Hastings, o loo gaosia ai le silia ma le 50,000 tone o fuālaau’aina suamalie, o fuālaau taumafamata, o fuālaau faisua i tausaga ta’itasi, e pei o pea, beans, saga suamalie ma karoti.
Na ta’ua e se tasi o le aufaigaluega i le Hawke’s Bay Today, o le Aso Lua na faailoa ane ai lea tala faanoanoa i le tapunia o le kamupani, ma e lagona le faanoanoa ona e faafuase’i lenei faaaliga ma matuā puupuu le taimi ua faato’ā faailoa mai ai, ma le auala foi na faailoa mai ai.
O le McCain New Zealand o se vaega o se kamupani telē ma e tele ona lālā i atunuu eseese o le lalolagi, le McCain Foods, o le falegaosimea pito sili lenei ona telē i le lalolagi o loo gaoisia frozen fries aemaise lava fries e fai mai le pateta.
O le tausaga e 1996 na faatau mai ai e McCain le nofoaga lea i Hastings mo le faatūina ai o le kamupani.
Na ta’ua e se sui sooupu a le McCain e pei ona lipotia e le Newstalk ZB, o le falegaosimea i Hawke’s Bay o le a tapuni pe a faamae’a le vaitau lenei o le tausaga mo ana galuega o le gaosia ma le fafaoina o nei oloa, lea e faamoemoe e faamae’a i le aso 31 o Ianuari i le 2027.
O se filifiliga ua faia ina ua uma ona faia se toe iloiloga o le faatinoga o galuega i le kamupani i Hastings ma iloa ai se suiga o le a faatino ai e le McCain le sapalaiina o ana oloa i totonu o Ausetalia ma Niu Sila, ma ua silasila ai le pulega, ua tatau ona sui se isi auala, se isi supply model o le a sili atu ona lelei ma atili lagolagosua i le vaai mamao a le kamupani.
O loo amata ona faatalanoa e le pulega i latou o le aufaigaluega o le a aafia i lenei suiga, i le faailoa ia i latou o faamatalaga uma ma saunia fesoasoani mo le sa’ilia o galuega, ma maua foi ni fesoasoani mai auaunaga e gafa ma le soifua manuia.
Saunoa le pulenuu o Hastings, Wendy Schollum, ua matuā lē fiafia lava i le tala ua sau i tua o le a tapuni lea kamupani.
Fai mai Schollum, o faai’uga faapenei e fai sina lavelave ma e faia o ni māfua’aga e aafia ai le lalolagi aoao ae o aafiaga e matuā afaina ai lava tagata i totonu o le atunuu aemaise le lotoifale o le vaipanoa o loo iai lenei falegaosimea.
O le amataga foi o lenei masina na sau ai le faasilasilaga a le Heinz Watties o le isi foi kamupani faapea, o le a lē toe faaauauina lo latou faatau atu ma le gaoisia o latou fuālaau’aina faafulisa poo frozen vegetables ma isi oloa, ua afaina ai foi le tusa ma le 350 nisi o avanoa faigaluega i totonu o le atunuu, ae to’a 50 i latou ua aafia galuega i le lālā o loo i Hastings i King St.
Puna o Faamatalaga: https://www.newstalkzb.co.nz/news/national/hastings-mccain-vegetable-factory-to-shut-in-2027-jobs-at-risk/
