E tapuni ane le taimi e faamuta ai suafa faaulu mo le filifilia o se ta’ita’i o le Green Party, e na o James Shaw le suafa o loo faaulu.
E le’i mafai ona faamaonia i le fonotaga faaletausaga a le pati i le masina talu ai le toe filifilia o James Shaw, ma o le mafuaaga lea na toe tatala ai le avanoa e saili se isi ta’ita’i e suitulaga ia Shaw.
E ui i le tele o tala ma masalosaloga i nisi o sui iloga o le pati e aofia ai Chloe Swarbrick, Ricardo Menendez March, Teanau Tuiono ma isi peitai o le tapunia ai o le taimi na tuuina mai e faaulu ai suafa, na sau ai ma le faasalalauga anapo e na o Shaw le igoa o loo faaulu.
E tusa ma faiga faavae a le pati o le a faia ai nei le palota ma e lua itu e filifili mai ai, o le faapalota loa na o Shaw poo le toe tatala o le avanoa, ma e moomia e Shaw le 75% palota ina ia faamausali ai lona toe tulai mai.
O ā faai’uga o le a iai, e tatau ona faailoa aloaia mai a o le’i tāina le 5 o le aso 12 o Setema.
