A o faanono manu le tapuaiga a Samoa i le lalolagi i le toe aso nai Moamoa o le a saili ai le auro moni i le afi, poo ai o le Toa Samoa ma Ausetalia o le a sola ma le siamupini o le lalolagi i le taaloga lakapi liki, e maeu le felanulanua’i o tapenaga i Samoa a o loma lea taaloga i le vaveao o le Aso Sa o lumanai nei.
O fale faigaluega, o a’oga, faalapotopotoga, ma o tatou tagata mai lava i fanau e oo i tupulaga talavou ma le au tino i matutua, ua salalau a latou faamanuia ma faatino ai foi le siva tau a le Toa Samoa i luga o upega tafailagi.
O le upu moni lava ia i Samoa ua matutu faleoloa o Saina ua leai ni fu’a ona e ui ina sii faafuasei le tau ona o le alumia i faatauga ona o le tapuaiga, ae e lei solomuli ai tagata.
O laei e pei o mitiafu lanu moana ua faapena foi ona faatau e laei mo le tapuaiga, ae e oo lava i laei o loo tusia ai le igoa o le au lakapi liki a le atunuu ua saoasaoa le manaomia.
O nisi faleoloa ua latou lolomi ata o le au i mitiafu ma faatau ma ua luu tupe ai.
O lea ua tapena le auaunaga a leoleo e faaopoopo le numela o Malu o le malo e galulue i le Aso Toonai ma le Aso Sa ona o le fia puipui i le saogalemu o le ola ma le soifua o tagata ona e mautinoa o le a tumutumu nofoaga i le taulaga, faapea foi nuu ma afioaga o le atunuu i solo a taavale, ma nisi tapenaga mo le tapuaia lava o le Toa Samoa.
Le faletua susuga Papalii Monalisa Tia’i Keti o le sui Komesina o le matagaluega o leoleo falepuipui ma le ola toe fuataina.
