Ua iai nei se finagalo o le afioga i le Faamasino Sili le afioga Satiu Simativa Perese ma le faamasinoga mamalu a Samoa, o le a faatino se tapu mo tagata auai ma molimau i le taimi e faagasolo ai ona su’esu’e tagi o moliaga o faatosina faaālatua e mafua mai i le palota tele, lea ua faatulaga e amata fofogaina i le aso 14 o le masina nei o Oketopa.
Ua faailoa e le Ofisa Sili ma o le Lesitala foi lea o faamasinoga le susuga Papalii John Taimalelagi Afelē i se faasilasilaga faalaua’itele, o le a loka potu faamasino o le Faamasinoga Maualuga o le a su’esu’eina ai molimau o ia matāupu i le taimi e amatalia ai taualumaga.
O le a faasā ona toe tuua ai potu faamasino e soo se tagata auai o itu o faamasinoga e oo lava i molimau, ma ua mafua ona o tulaga sa aliali mai i le su’esu’eina o tagi foi o moliaga o faatosina faaālatua i le tuana’i o le palota tele o le tausaga e 2021.
O le faasilasilaga foi a le Ofisa Sili ma o le Lesitala lea o faamasinoga, le susuga Papalii John Taimalelagi Afelē na ia faailoa ai le mae’a tuuina atu o tali a sui o loo molia i tuua’iga o faatosina faaālatua o le palota tele poo counter petitions, se’ia vaganā le talosaga poo le tagi mai Falealili 2 o le Aso Tofi lenei e atoa ai le lima aso e tatau ona tuuina atu ai se tali mai le sui na manumālō i le filifiliga a lea itumalo palota.
Ua faailoa ai foi e le Ofisa Sili e lē sa’o se lipoti a le nusipepa o le Samoa Observer sa faasalalau ai e tasi se tagi o moliaga o faatosina faaālatua ua toe ave i tua.
Faaalia e Papalii e le’i oo atu i le ofisa o faamasinoga se talosaga e toe faasolomuli ai se matāupu mai tagi e valu ua faaulu atu.
