Na tuuina mai e le afioga i le faamasino o Vui Clarence Nelson se poloaiga e tapu ai ona lipoti e ofisa faasalalau soo se faamatalaga e faatatau i le mataupu a Lema’i Faioso Sione ma Malele Paulo.

Na saunoa Vui o lea poloaiga ua faia e tusa ma le vaega 9 (1) o le Faavae o Samoa o loo faapea mai ai:

“I le fua faatatau o aiātatau a le tagata i lo la va ma le tasi tagata faapea tiute tauave, poo se isi moliaga e faasaga ia te ia ona o se soligatulafono, ua tofusia tagata taitoatasi uma ma le tulaga tatau e faafofogaina ai ma le faalauaitele i totonu o se taimi e fuafuaina tatau e se faamasinoga tutoatasi ma le lē faaituau na faatuina e le tulafono.”

“O le a faaalia i le tulaga faalauaitele le iuga a le faamasinoga, peitai, o le a lē mafai ona auai le autusitala o nusipepa ma le aufaalogologo i le faamasinoga atoa poo se vaega mo le lelei o tagata, sologa lelei o tagata uma poo le saogalemu o le atunuu, o itu foi e manaomia ai le puipuia o le lelei o tamaiti poo le soifuaga faapitoa o e auai e manaomia faapea, poo le oo atu lava i le tulaga tatau e fia tausisia i le taofi o le faamasinoga i itu faapitoa e avea ai le faalauaiteleina ma ala e tolofia ai itu tau le faamasinoga tonu.”

E silia i le 10 molimau o le itu a leoleo o loo valaauina i luma o le faamasinoga Maualuga e molimau i lea mataupu.

E toalima  faatonu poo judges of the fact o loo iloiloina mau o lea mataupu.

O le afioga Unasa Sapolu o loo tulai mo Lema’i Sione, ae o le alii loia o Quentin Sauaga o loo tulai mo Malele Paulo.

O loo teena e i laua o loo tulai moliaga o le taupulepule e faaoo le maliu i lē sa avea ma Palemia i lea taimi ia Tuilaepa Sailele Malielegaoi.

O le vaiaso atoa lenei o le a iloilo ai e le faamasinoga faapea ai ma le laulau a faatonu lea mataupu.