Ua talia e le Faamasinoga Maualuga le talosaga a loia mo le itu a leoleo ina ia faasā pe tapu ona faailoa lautele i faasalalauga, ni faamatalaga e iloa ai tamaitai e to’alua o loo aafia i le mataupu tau faamasinoga o loo molia ai le faia’oga o le ‘aulakapi a le Manu Samoa lea o loo faamālōlō lē tumau se’i mae’a su’esu’ega a le faamasinoga i ona moliaga.
O le tapu foi lea e e pei ona faailoa i se finagalo o le faamasinoga i le Aso Gafua o lenei vaiaso, ua faasā ai ona faasalalau o soo se faamatalaga e faasino i moliaga o loo tuua’ia ai le susuga Mase Mahonri Schwalger.
O le tamaitai loia o Leinafo Taimalelagi Strickland o loo tula’i mo Mase Mahonri Schwalger lea ua faaauau ona tatala i tua i ni aiaiga e pei o le taofia o lona tusifolau ma saini i le ofisa o leoleo e faatali ai Aperila o le tausaga fou 2025 e su’esu’e ai ona moliaga.
