Ua faalauiloa mai e le malo, fuafuaga o le a faatino mo totogi faaopoopo o loo faapena ona fai i luga o faatau a tagata mai faleoloa ma fale’aiga poo le vaega ua faaigoaina o le in-store payment surcharges.
Ua latou faaalia o le a tapu, pe o le a taofia ma faasāina ona toe toe faia e faleoloa ma fale’aiga lea vaega i taimi e faia ai faatau a tagata.
E tusa ai ma lenei faamoemoe, ua latou ta’ua o loo latou tilotilo ina ia oo atu i le tausaga e 2026 ua lē toe faia lea tulaga.
I lea fuafuaga ua faalauiloa ai e le malo – teuteuga o tulafono i le Retail Payment System (Ban on Surcharges), e folasia i le faai’uga o le tausaga lenei e 2025.
Faaalia e le malo mai a latou faamaumauga, pe tusa ma le $150 miliona le tupe o loo totogi e tagata faatau e ala i surcharges nei i le tausaga, ma le oo atu i le 65 miliona o loo faamauina o tupe ua ova ona totogi.
E manatu le to’atele, o se fuafuaga e matagofie tele, o le tofa tatala i le silasila i le tulaga o tupe faaalu a tagata, ae ua faaalia popolega a nisi o sui o loo galulue i auaunaga tau i faletalimalo ma tagata tafafao mai.
Ua latou ta’ua ona o le a aveesea le totogi faaopoopo lenei, o lona uiga o le a iai ni tau faaopoopo i oloa ma auaunaga, ma o se ta telē lea i nai tagata o le atunuu.
O isi ua latou ta’ua o le mafua’aga o ia vaega, o le tetele o tau i teugatupe a fā; poo bank fees, ma e tatau lava ona fai iai se fuafuaga.
Ua māua i lipoti o le tapu e faamauina o le a faatino lea mo le tele o faleoloa ma fale’aiga ae maitauina e lē o aofia ai faatau o loo faia i luga o upega tafa’ilagi, o cards mai nisi o atunuu ma le tele o vaega o loo aofia i lalo o le American Express ma le UnionPay.
Ae e ui i nei popolega, o loo faailo mai e le malo, o le latou naunauta’iga ina ia faafaigofie auala e totogi ai le tele o oloa ma ia maua sina faamāmā avega mo nai tagata faatau.
Ma ia lelei ma talafeagai foi fetuuna’iga mo nai pisinisi ma auaunaga.
Puna o Faamatalaga: https://www.1news.co.nz/2025/07/28/govt-proposes-ban-on-in-store-payment-surcharges/
