O lea ua faalauiloa i auala o fesootaiga i luga o upega tafailagi le faia i lo tatou atunuu i le masina fou o Me, o se faaaliga tele ma se koneseti o le a faalauiloa ai le taleni pese ma musika a nisi o alo lauiloa o le atunuu, aemaise o nisi e talenia i le musika mai fafo o le a auai.

Ua faailoa e le PacificCast o loo lotolotoi i le tapenaina o lea faamoemoe, o le a muamua faia i Samoa lea faaaliga ma se koneseti o musika i le naunautaiga e saga faaolaola ma atiina a’e le tomai o fatuga o pese poo musika.

O se tasi lea o tapenaga ua nofo tatali iai le atunuu i lena masina fou aemaise o tagata e fiafia i fatuga o pese ma musika.

Ua faailoa e le taitai o le Malo i le vaiaso na tea nei, o le tasi lea o polokalame o le faaiuina o faafiafiaga o le onosefulu tausaga o le Tutoatasi, ae ua iai foi le faamoemoe e faatino lea faaaliga poo se music festival i le faamanatuina o le 61 tausaga o le Tutoatasi i le amataga o le masina o Iuni.